近排一開電視就係《皓鑭傳》，觀眾相信見到唔少戰國時期嘅人物同故事。戰國七雄爭霸，名士輩出，當中著名嘅外交家張儀同蘇秦，以合縱連橫左右多國外交。張儀同蘇秦齊齊師承鬼谷子，佢哋如何憑住各自嘅三寸不爛之舌，牽動國與國之間嘅命運？

先講張儀，話說佢有次同楚國相國飲嘢，點知楚相後嚟唔見咗塊玉璧，有人話係又窮又無品嘅張儀所偷，搞到佢被打咗幾百下。返歸之後，張儀老婆嘲笑佢唔讀書、唔去結交權貴嘅話，又點會無啦啦被打？張儀都答得幾有技巧，佢問老婆「我條脷仲响唔响度？」張太笑笑口咁答「响度」，張儀聽到就好安心，搵食工具保得住，「咁就足夠喇」。

根據《史記》所講，張儀後嚟去咗趙國，搵老同學蘇秦，點知蘇秦串串貢，羞辱張儀一番，張儀自然嬲爆爆走人，把心一橫，去秦國，輾轉成為秦惠文王嘅重臣。張儀提出賄賂魏國、同燕國聯姻等政策，令六國聯盟內部分裂，佢嘅計謀唔單止「拆散」聯盟，仲令原本嘅敵人企到自己嗰邊。

張儀咁有計仔，秦惠文王封咗佢做武信君，仲賜五座城邑。張儀嘅連橫之策成為日後秦滅六國、統一天下嘅基本戰略，不過秦惠王過咗身之後，繼位嘅秦武王同張儀唔啱，張儀出逃魏國擔任魏相，一年後就離世。張儀一生周旋於唔少諸侯國之間，牽動政壇局勢，《孟子》都有提過，張儀同另一位縱橫家公孫衍「一怒而諸侯懼」，可見其影響力。 

劇照嚟自網絡。